Ang igma ko kaina

Amo dya ang igma ko kaina. Prito nga pesugo. Laswa - karbasa, balagay, sitaw, okra, kag tugabang. Kan-on. Dapat kamuros ang bugas namon. Brown. Pero naubosan kami. Ang mga laswa nga diya halin sa uma. Preska pa. Ang karbasa lang ang ginbakal ko sa talipapa sa Tabucan.



Amo dya ang typical ko nga igma. Simple lang. Mayad kay waay ang mga bata. Sa eskwelahan sanda. Makakaon ako kang akon gusto kag husto sa lawas ko. Kon diyan abi ang mga bata, daw lain ang anda gusto. Hambal gani ka gurang ko, 'Daddy, kain naman tayo ng bad for the body.' Daw naluoy man ako kananda. Gani, kon imaw namon sanda magkaon, nagasugba kami ka baboy, o manok. Kon kaisa beef briskets.

Ang igma ka mga bata ko, amo man diya. Gindugangan lang ti meat balls para maganahan gid. Ginadul-ongan sanda sa school. Kon kaisa nagapabati-bati sanda nga namit kuno magkaon sa canteen o sa McDo. Pero kon kaisa ginahambal man nanda nga gusto ka mga classmates nanda ang anda igma. Kay ang anda dapli waay ginabaligya sa canteen. Kag personal pa nga gina-serve kang anda Mommy. Gusto man daad ka mga classmates nanda nga ang anda man mga Mommy mag-serve kang anda igma.



Daw waay na ako gusto ka manok. Baboy pwede pa. Pero waay lang taba kag kon kaisa lang. Kang una nagakaon pa ako ka bulalo. Pero kang makita ko sa TV documentary ang pag-liposuction ka tambok nga babae, nga ang ginkuha ka na daw sabaw ka bulalo, gapangindi na gid ko sa bulalo o karne.



And akon kaina nga panghimagas amo ang avocado nga may gatas. Astig gid. Akon na dya produkto. Una nga bunga kang tanom ko nga pilit nga avocado sa uma.

Ti diyan sa abroad namit man igma niyo?

@